Car moy bien malade dans ma couche
Prins papier encre et par escript couche
Le débat de guerre aussi de la paix
Tresnoble par laquelle plus me paistz
Car paix ouys lors plaine de raison
Et guerre ly arguoit par desraison
Par despit en tout mal et par delict
De les ouyr toutes deux prins délit
Et plaisir, riens me dura celle nuyt
Si maladie que toutes gens nuyt
M'auoit fait oblier de leurs parolles
Vous en diray en peu vers ou par rolles
Ce que i'en scay ou ce que m'en souuient
Guerre trouuay disant comme soubz vient

Guerre cy commence
Par fiere loquence

GUERRE

Guerre suis sus toute terre emperiere
Tressinguliere. dame aussi maistresse
II n'est personne au monde si fiere
Qu'amoy s'affiere. que ne tue ou fiere
Quant ma banière, ou enseigne se dresse
Flaterye trayson iongleresse
Enuye faulx raport me font seruice
Auec telz gens foiz tousiours mon office

PAIX

Et ie suys paix de tous biens tresoriere
De Dieu chambrière, pour mon humilité
Qui me veult adieu souuant fait prière
Foy droituriere. aussi droite lumière
Sont auec moy amour aussi vnite
Raison justice bon renon vérité
Telz gens me seruent a mon grant affaire
Tout mon cas n'est que de viure et bien faire